Plantun de Prouvènço

Pèr coumpara dos planto d'encò nostre

Arenaria serpyllifolia & Plumbago europaea

Arenaria serpyllifolia

Caryophyllaceae

Nom en français : Sabline à feuilles de serpolet.

Descripcioun :
Pichoto planto de l'an, forço coumuno, que fai pas mai de 20 cm. Li cambo soun primo, peludo, e souvènt pegouso. A de pichòti fueio redouno e óupousado. Li petalo blanco, soun mai courteto que li sepalo. I'a tres estile. I'agrado li relarg sablous, li roucaio, tepiero seco e ermas pulèu proche dis oustau. Se destrìo de sa cousino Arenaria leptoclados bonodi si grano de mai de 0,5 mm e si fru boumbu. Sarié uno bastardo entre A. leptoclados x A. marschlinsii (4X emé 2n = 40).

Usanço :
Parèis que li japounés la manjon, cuecho, en soupo o en tian.

Port : Erbo
Taio : 2 à 20 cm
Fueio : óupousado
Tipe bioulougico : Teroufite
Cicle bioulougico : Planto de l'an

Gènre : Arenaria
Famiho : Caryophyllaceae

Ordre : Caryophyllales

Coulour de la flour : Blanco
Petalo : 5
Ø (o loungour) flour : 1,5 à 2 mm
Flourido : Printèms - Estiéu

Sòu : Ca
Autour basso e auto : 0 à 1800 m
Aparado : Noun
Mai à juliet

Liò : Roucaio - Tepiero seco - Champ - Sablo
Estànci : Termoumediterran à Subaupen
Couroulougi : Paleoutemperado
Ref. sc. : Arenaria serpyllifolia L., 1753 (= Arenaria serpyllifolia subsp. serpyllifolia )

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.